التلصاق
زجل/لحسن بوزيان
كنت نتسارة في سوق من لسواق
لقيت الناس مجمعة تعزل
شريت قلم ومجموعة من لوراق
بيه نويت نكتب قصيدة من الزجل
گلست وانا كنسمع للصوت لبواق
في بلاصة فيها الظل
كتبت كلام داخل في النطاق
ملي قريتو لقيتو تبدل
عرفت بلي القلم مراق
واعزيز عليه يطبل
ما يحسابش لي هاذ النوع غراق
ومن راسو يكمل
تشادينا يا رفاق
وخرجت كلامي بلا ما نتعطل
قلت ليه معندك ضمير ولا أخلاق
وهاذ الشئ لي كتبتي ماكنت عليه معول
احسبت بلي ضميرك فاق
ولكن انت في حضن اسيادك مكسل
عزيز عليك التلصاق
وفين ماكان لمداد لجيهتو محول
قلت ليه هاذا راه نفاق
والى كذبتيني سول
