والو.. والو.. والو
زجل حليمة مجاهد
والو …
غ البرد
والريح يديه الريح
وصف من الدياب
وعشرين غراب
وعشرة ثعالب
شادين صف طويل
الغابة مكتبانش ف الليل
والو مور الظلام
ولا تحت الظل
بين السوايع
غ رقصة المدبوح
عريان يتمايل
والو..
غ انا تلف ليا الحساب
ف لعادة كنغرق نعد ف لفلايك
من بعد ما لفروج يعوگ بخيط الصباح
والو…
غ الهوا
وشوية من لكحل ف لقصة
غ شي عتارس ينقزو
فوق لكتاف
وعلى خناششهم اتر لما
شفت سحابة ملي جف الريق
بلا شتا
بلا ربيع
ؤشفت الغابة مقلقة
طافية ف وجه لفراخ
والشوفة طايحة دموع
ما كتموت ما كتجف
يمكن تفيض من بعيد
والو…
يمكن غ خيال
ولا لبرد دفعني نص خطوة لگدام
ما بقا حد يستاهل
تا هد الأرض حشمانة
والو
م كاينش لي يمد يديه
من غير يدك
م كاين شرف من لحق
والعيطة عليه
بحالي بحالكم
م يعجبني لعجب
وعييت من السفر
ت حاجة م تنجيك
من ثقيب لودن
وقريص النحل
ودگان لبرة
ولسيع اللفعة
من غير لبغو
والو
غ بنة لحياة
فسدتها السعايا
ومشات الصحة
وضاع لعمر
مولة نوبة
وفين التوبة
والو..
معندي فاش نفيدك
غ شي نصايح عل النفس ثقل من الحجر
