حديث التلة
زجل/عبد القادر السدراوي.
رجعت للتلة نطل ؤ نرگب
نتسارا ؤ نسقي الغرس
لقيت شي ينهب ؤ شي يحطب
الشجر اخضر ؤ الجدر يبس
القطيع شي مربوط ؤ شي امسيب
شي مكمم ؤ شي في الزريبة تحبس
الضرع نشف ؤ البگرة ما بقى فيها مايتحلب
لعجل لشكر يزوك ؤ جاع لدبس
مول العود على عودو ركب
ؤ بستان الورد مكرفس
شفت موكة تخطب
ؤ بلارج داير العرس
ؤ الذيب يتبسم ؤيجدب
عرفتو باللي ناوي يفرس
قلت نطل بلا ما نزرب
بديت نطل وانا قاطع الحس
