الكلاب تتنابح
زجل الحسن بوزيان
والكلب في خوه يهرنن
الحمير تترادح
والخيل في مرابطها تحنحن
شكون الخاسر شكون الرابح
وشكون لي تمحن
فينك يا سعد الذابح
فيك ترتاح لوذن
لغمام غطى لمشابح
والبرد في الجوف اسكن
فين نور المصابح
الظلام عشش وتمكن
شكون يگاد لخواطر ويصالح
وشكون يذوق المرورة ويستبنن
شكون يسكت داك الكلب الگارح
وشكون يگاد لعبار ويوزن
فين كلام لبارح
فين الوعد لمعفن
لكان مرموز ارجع واضح
ولكذوب من الصح تبين
شحال من واحد في لكذوب فالح
واش لكذوب يفك من الكفن
